नेपाल ट्रष्टको सम्पत्ति ओलीकै संरक्षकत्वमा दुरुपयोग

काठमाडौं । प्रधानमन्त्री केपी ओली संरक्षक र उपप्रधानमन्त्री ईश्वर पोखरेल अध्यक्ष रहेको नेपाल ट्रस्टको खर्बौंको सम्पत्तिको प्रधानमन्त्री र उवप्रधानमन्त्रीकै सक्रियतामा चरम दुरुपयोग भइरहेको छ । विभिन्न ठाउँमा सरकारकै संरक्षणमा रहेका व्यवसायीले दोहन गरिरहेका छन् । आफू निकट व्यवसायीलाई कार्यभार सुम्पिएर सरकार राजा महाराजाबाट प्राप्त सम्पत्तिको दुरुपयोगमा व्यस्त छ । त्यस्तै कतिपय सम्पत्ति संरक्षणको अभावमा अलपत्र मात्र परेका छैनन् तिनीहरुको संरक्षणको अभावमा जीर्ण हुन पुगेका छन् ।

राजा वीरेन्द्र र उनको परिवारको नाममा रहेको सम्पत्ति संरक्षण र सदुपयोग गरी शिक्षा र स्वास्थ्य क्षेत्रमा लगानी गर्ने भन्दै ०६४ मा नेपाल ट्रस्टको स्थापना गरिएको थियो । तर, १४ वर्ष पुग्दा पनि शिक्षा र स्वास्थ्यमा ट्रस्टको कुनै सम्पत्ति सदुपयोग हुन सकेको छैन । यससम्बन्धी कुनै कार्ययोजना नै बनाइएको छैन । बरु, सरकारले व्यापारीको स्वार्थपूर्ति गर्ने गरी सम्पत्तिको दुरुपयोग गरिरहेको छ ।

लिजमा लगाएका कतिपय जग्गाबाट ट्रस्टले भाडासमेत उठाउन सकेको छैन । सम्झौता सकिएको सात महिना हुन लाग्दा पनि काठमाडौं प्लाजा खाली गर्न सकेको छैन । उपत्यकाकै बजार क्षेत्रका जग्गाहरूसमेत ट्रस्टले भाडामा लगाउन सकेको छैन । अन्य सहरका मुख्य ठाउँमा रहेका सम्पत्ति पनि अलपत्र छन् । ठमेलदेखि चितवनसम्मका जग्गामा मुद्दा परेको छ । जसबाट ट्रस्टले महिनामै करोडौँ गुमाइरहेको छ । यसरी सरकारको सम्पत्ति प्रधानमन्त्रीकै रोहबरमा लुट मच्चाउने काम हुनु दुःखको कुरा हो । लुट माथि लुट मच्चाउनु नै सरकारको कार्यशैली भएको छ भन्दा फरक नपर्ला ।   -नयाँ पत्रिकाबाट साभार