सूर्य चिह्न र बहुसंख्यक सभासद हाम्रै होः माधवकुमार नेपाल

काठमाडौँ । नेपाल कम्युनिष्ट पार्टी नेकपा प्रचण्ड–माधवपक्षका अध्यक्ष माधवकुमार नेपालले सूर्य चिह्न र सभासदहरु आफ्नो पक्षमा पर्ने बताएका छन् ।
वामपन्थी नेता एवं पूर्वउपप्रधान तथा अर्थमन्त्री स्वर्गीय भरतमोहन अधिकारीको दोस्रो स्मृति दिवसको अवसरमा भरतमोहन अधिकारी स्मृति फाउण्डेशनले विराटनगरमा गरेको कार्यक्रममा बोल्दै उनले सर्वोच्च अदालतले हराउँदा समेत प्रधानमन्त्रीले राजीनामा नदिनु नैतिकता खडेरी भएको टिप्पणी गरेका छन् ।

उनले विश्वका अन्य मुलुकमा भए सर्वोच्चले फैसला सुनाउने बित्तिकै राजनीमा दिने नजिर भए पनि नेपालमा सत्ता सम्हालिरहेका व्यक्तिमा नैतिकता नै नभएको आरोप लगाए ।

अध्यक्ष नेपालले नैतिकताको प्रश्नमा भरतमोहन र मनमोहन जस्ता उदाहरणी व्यक्तिबाट पाठ सिक्नु पर्ने बताउँदै संसदबाटै प्रधानमन्त्री ओलीलाई हटाउने चेतावनी दिए ।

उनले सर्वोच्च अदालतले संसद पुनःस्थापना गरिसहेकाले सबै सांसदहरुले आफुहरुलाई साथ दिने र सूर्य चिह्न पनि आफूहरुले नै प्राप्त गर्ने जिकिर गरे । उनले सूर्य चिह्नमा कसैलाई कर्के नजर हेर्न नदिने बताउँदै चोइटिएका पार्टीले नभई मूल पार्टीले प्राप्त गर्ने जिकिर गरे ।

अध्यक्ष नेपालले नेपालको राजनीति भरतमोहनको पथमा चले पनि प्रधानमन्त्री केपी शर्मा ओलीले कहिल्यै पनि पाठ नसिकेको आरोप लगाए ।