काठमाडौं । आन्तरिक राजस्व विभाग केही दिनअधिदेखि गरेको बजार अनुगमनको क्रममा कानुन विपरित कारोबार गर्ने ३ सय २ जना करदातालाई कारबाही गरेको छ । विभागले उपभोक्ताबाट आएको सूचनाको आधारमा आफु अन्तर्गतका कार्यालयहरु मार्फत बजार अनुगमनलाई तिव्रता दिएको छ । विभाग अन्तरगतका ३६ वटा करदाता सेवा कार्यालयबाट भदौ २७ गतेदेखि शुरु गरेको सो अनुगमनमा प्रत्येक कार्यालयबाट ३/३ वटा टोली परिचालन गरिएको विभागले जनाएको छ ।
बजार अनुगमन विभागको नियमित कार्य भएको जनाउंदै दशैं, तिहार जस्तो चाडवाडको समयमा बढी कारोवार हुने र सो क्रममा विल विजक जारी नहुने गुनासो धेरै तिरबाट आउने भएकोले गत वर्ष जस्तै यस वर्ष पनि बजार अनुगमनलाई तिव्रता दिइएको जनाएको हो । भदौ २७ गतेका दिन मात्र ८४ वटा अनुगमन टोलीले ३ सय ८५ वटा करदाताको अनुगमन गरी ४० वटा करदाताहरुलाई कारोवार स्थलमै तत्काल कानूनी कारबाही गरिएको विभागले बताएको छ ।
त्यसैगरी, भदौ २८ गतेका दिन ५३ वटा टोलीले ५ सय ६६ वटा करदाताको कारोवार स्थल आकस्मिक रुपमा अनुगमन गरेकोमा १ सय १० वटा करदाताहरुले कर कानून परिपालना नगरेको पाइएको हुंदा १ सय १० करदातालाई प्रचलित कर कानून बमोजिम जरिवाना गरेको विभागले जनाएको छ । भदौ २९ गते ५२ वटा अनुगमन टोलीले ५ सय ५३ वटा करदाताको अनुगमन गरेकोमा ८३ वटा करदाताहरुलाई प्रचलित कानून बमोजिम जरीवाना गरेको जनाएको छ ।
टोलीले भदौ ३० गते ४५ वटामा अनुगमन गर्दा ४ सय ४७ वटा करदाताको अनुगमन गरेर ६९ करदातालाई कारवाही गरेको र विगत चार दिनमा २ सय ३४ टोलीबाट १ हजार ९ सय ५१ वटा करदाताको अनुगमन गरी कर कानून पालना नगर्ने ३ सय २ करदातालाई जरिवाना तथा अन्य कानुनी कारबाही गरेको विभागले जानकारी दिएको छ ।
अनुगमनका क्रममा अन्तःशुल्क स्टिकर नलगाइएका गुट्खा तथा इजाजत नलिई कारोवार गरेको मदिरा र अन्तःशुल्क स्टिकरको प्रयोग नभएको मदिरा बरामद गरेको छ । अनुगमन टोलीले नक्कली स्टिकरको प्रयोग, अवैध मदिराको प्रयोग, करपाटी नराख्ने, विवरणहरु पेश नगर्ने, खाता अद्यावधिक नगरिएको, दर्ता नगरी कारोवार गरेको, घरबहाल कर दाखिला नगरेको, विल विजकको प्रयोग नगरिएको जस्ता क्रियाकलाप गरेको फेला पारेकोले कानूनी कारवाही गरेको हो ।
अनुगमनका क्रममा कर अधिकृत नेतृत्वको टोलीले व्यवसायीहरुलाई कार्यस्थलमा नै करदाता शिक्षा प्रदान गर्नुका साथै कर कानुनको पालना गर्न सुझाव समेत दिएको छ । कर अधिकृतको नेतृत्वमा खटिएको टोलीले कारवाहीमा परेका र थप शंकास्पद देखिएका करदाताहरुलाई थप अनुसन्धानका लागि खरीद बिक्री खाता नियन्त्रणमा लिएर कार्यालयमा उपस्थित हुन पत्राचार समेत गरेको विभागले जनाएको छ । आन्तरिक राजस्व विभागले बजारमा विलविजक जारी नगर्ने करदाताको व्यवहारमा सुधार नभएमा अझ कडा रुपमा प्रस्तुत हुने चेतावनी दिनुका साथै बजार अनुगमनलाई वर्षैभरी निरन्तरता दिने पनि विभागले जानकारी गराएको छ ।
Add Comment