काठमाडौं । अख्तियार दुरुपयोग अनुसन्धान आयोगको नेपालगञ्जस्थित कार्यालयमा स्थानीय तहसँग सम्बन्धित उजुरी दर्ता धेरै भएका छन् ।
यसैगरी बाँके, बर्दिया, दाङ र रोल्पा कार्यक्षेत्र रहेको नेपालगञ्ज कार्यालयमा विभिन्न विषय क्षेत्रगत कार्यालयको उजुरीमध्ये सबैभन्दा बढी स्थानीय तहका उजुरी रहेको नेपालगञ्ज सम्पर्क कार्यालयका प्रमुख विजयराज पौडेलले जानकारी दिएका छन् ।
उनका अनुसार गत आर्थिक वर्ष २०७८/७९ देखि चालु आवको कात्तिक महिनासम्म स्थानीय तहका १ सय ६३ उजुरी दर्ता भएका छन् । चालु आवको ४ महिनामा मात्रै ६७ उजुरी दर्ता भएका छन्। परेका उजुरीमध्ये ३३ फछ्र्योट भइसकेका छन् भने १ सय ३० फछ्र्योट हुन बाँकी रहेको र यो अवधिमा स्थानीय तहकै शिक्षा अन्तर्गतका ५६ उजुरी दर्ता भएकामा १३ उजुरी फछ्र्योट भएको बताएका छन् ।
त्यस्तै ४३ उजुरी फछ्र्योटको प्रक्रियामा रहेका साथै नेपालगञ्जस्थित कार्यालयमा गत आव २०७८/७९ देखि चालु आवको कात्तिक महिनासम्म उद्योग, पर्यटन वन तथा वातावरणसम्बन्धी ३०, भूमि व्यवस्था सहकारी तथा गरिबी निवारणसम्बन्धी २४ र भौतिक पूर्वाधार विकास मन्त्रालयसम्बन्धी १७ उजुरी दर्ता भएका छन् ।
हालसम्म बाँके, बर्दिया, दाङ र रोल्पा कार्यक्षेत्र रहेको नेपालगञ्ज कार्यालयमा चालु आवको कात्तिक मसान्तसम्म १ सय ७१ उजुरी दर्ता भएकामा सबैभन्दा बढी बाँकेका ८०, दाङका ५१, बर्दियाका २२ र रोल्पाका १८ उजुरी दर्ता गरेका छन्।
अदुअआको नेपालगञ्ज सम्पर्क कार्यालयका प्रमुख पौडेलका अनुसार स्थानीय तहमा सार्वजनिक खरिद र निर्माणतर्फ गलत स्टिमेट तयार पार्ने, प्रक्रिया र नियम कानुनको पालना नगर्ने नगराउने, आवश्यकभन्दा धेरै सामग्री खरिद गर्ने, जिन्सी दाखिला नगर्ने वा गलत दाखिला प्रतिवेदन तयार पार्ने, उपभोक्ता समितिसम्बन्धी कार्यविधि पालना नगर्ने वा गलत प्रतिवेदन तयार गर्नेजस्ता प्रवृत्ति पाइएको छ ।
Add Comment