काठमाडौँ । नवनिर्वाचित अमेरिकाकी राष्ट्रपति जो बाइडेन एवं उपराष्ट्रपति कमला ह्यारिसले आज पद तथा गोपनियताको शपथ लिँदैछन् ।
उक्त कार्यक्रममा हिंसा हुन सक्ने भन्दै अमेरिकाका सबै ५० वटै राज्यमा सुरक्षा व्यवस्था चुस्त बनाइएको छ ।
२० जनवरीको दिन अमेरिकामा नवनिर्वाचित राष्ट्रपतिले शपथग्रहण लिने परम्परा रहेको छ। यो दिन निर्वाचित राष्ट्रपतिको स्वागत तथा निवर्तमान राष्ट्रपतिको बिदाई गरिन्छ। लगातार दुईपटक निर्वाचित भए केवल स्वागत मात्र गर्ने गरिन्छ । डेमोक्रेटिक पार्टीकबाट निर्वाचित जो बाइडेनले आज राति १०.४५ बजे ४६औँ राष्ट्रपतिका रूपमा शपथ लिनेछन्।
यसपटकको शपथ समारोह सामान्य हुनेछ किनभने कोरोना भाइरसका कारण ८० प्रतिशत शपथ कार्यक्रम भर्चुअल रूपमा गरिन लागेको छ । ६ जनवरीमा रिपब्लिकन पार्टीका समर्थकले क्यापिटल हिलमा गरेको हिंसात्मक गतिविधिपछि राष्ट्रपतिको शपथ कार्यक्रम सामान्य ढंगले हुन लागेको अमेरिकन एजेन्सीहरूले जानकारी दिएका छन् ।
५० राज्यमा सुरक्षा व्यवस्था निकै बलियो बनाइएको छ यसमा अमेरिकाको राजधानी वासिङ्टन डिसीलगायत छन् । एजेन्सीहरूले बताए अनुसार शपथ कार्यक्रममा हिंसात्मक गतिविधि हुन सक्ने आशंकाका साथ सुरक्षा व्यवस्था कडा बनाइएको छ ।
राजधानी वासिङ्टनमा १५ हजार विशेष सुरक्षा सैनिक परिचालन भएको छ। साथै, राष्ट्रिय सुरक्षा फोर्सले पनि गस्ती गरिरहेको छ। राष्ट्रपति डोनाल्ड ट्रम्प र उनका समर्थक अझै पनि बाइडेनले धाँधली गरी जित निकालेको दाबी गरिरहेका छन्। तर, ट्रम्पले त्यसको कुनै पनि प्रमाण दिन सकेका छैनन्। बाइडेनको शपथमा राष्ट्रपति ट्रम्प सहभागी नहुने भएका छन्। २० जनवरीको दिन राष्ट्रपतिको शपथ कार्यक्रममा भाग नलिने अहिलेसम्म अमेरिकामा तीनजना मात्र राष्ट्रपति थिए। ट्रम्प बुधबार क्यापिटल हिलमा नगए उनी शपथ कार्यक्रममा भाग नलिने चौथो राष्ट्रपति बन्नेछन्। सन् १८०१ मा जोन एडम, १८२९ मा क्विन्स एडम्स तथा १८६९ मा एन्ड्रयु जोनसन शपथ कार्यक्रममा गएका थिएनन्।
गत साता राष्ट्रपति ट्रम्पले भनेका थिए, ‘म यो घोषणा गर्छु कि लोकतन्त्रको परम्परा तोड्न पछि पर्दिनँ।’ निर्वाचित राष्ट्रपतिलाई बधाई दिन आफू क्यापिटल हिलमा उपस्थित नहुने उनको भनाइ थियो। तर, उपराष्ट्रपति माइक पेन्स भने कार्यक्रममा सहभागी हुने भएका छन्। बाइडेनले पेन्सको निर्णयलाई बहादुरीको संज्ञा दिँदै स्वागत गरेका छन्। शपथ कार्यक्रममा पूर्वराष्ट्रपतिहरू जर्ज डब्लु बुस तथा उनकी श्रीमती लौरा बुस, बाराक ओबामा र उनकी श्रीमती मिसेल ओबामा तथा विल क्लिन्टन तथा श्रीमती हिलारी क्लिन्टन आउने एजेन्सीहरूले जनाएका छन्। यसपटक शपथ कार्यक्रममा भाग लिने सांसदलाई दुईवटा मात्र टिकट दिइएको छ। उनीहरूले आफूसँगै एकजना पाहुनाका रूपमा ल्याउन पाउँछन्।
जोन जी रोवर्ट जुनियरले क्यापिटल हिलमा जो बाइडेनलाई राष्ट्रपति पदको शपथ दिलाउनेछन्। त्यसपछि बाइडेनले भाषण दिनेछन्। उनले मतदातालाई धन्यवाद दिनेछन्। यो कार्यक्रमपछि बाइडेनलाई सैनिकहरूले सम्मान गर्नेछन्। विश्व चर्चित गायिका लेडी गागाले राष्ट्रिय गान गाउनेछिन्। राष्ट्रपतिको शपथ कार्यक्रममा जेनिफर लोपेजको सांस्कृतिक प्रस्तुति रहनेछ। त्यसपछि बाइडेन क्यापिटल हिलदेखि ह्वाइट हाउसको यात्रामा निस्कनेछन्। ह्वाइट हाउस र क्यापिटल हिलबीचको दूरी दुई किलोमिटर छ।
नोभेम्मबर २०, सन् १९४२ मा जन्मिएका जो बाइडेनको पूरा नाम जोसेफ रोबिनेट बाइडेन जुनियर हो। उनी सन् २००९ देखि २०१७ सम्म बाराक ओबामाको राष्ट्रपतीय कार्यकालमा उपराष्ट्रपति रहेका थिए। बाइडेनलाई एक प्रभावशाली वक्ता, कुशल कुटनीतिज्ञ, अनुभवी, कुशल प्रचारकका रूपमा लिइन्छ।
क्यालिफोर्नियाको ओक्लान्डमा जन्मिएकी कमला ह्यारिसकी आमा भारतीय मूलकी हुन् भने पिता जमैकाका हुन्। उनले अश्वेत विश्वविद्यालय र कलेज भनेर ऐतिहासिक रूपमा चिनिएको हावर्ड विश्वविद्यालमा अध्ययन गरेकी हुन्। ५५ वर्षीया कमलाले अमेरिकाको पहिलो अश्वेत महिला उपराष्ट्रपतिको शपथ लिन लागेकी हुन् ।
Add Comment