काठमाडाैं । ३४ वर्षीय अर्जेन्टिनी सुपरस्टार लियोनल मेस्सी स्पेनिस फुटबल क्लब बार्सिलोनाबाट बाहिरिएका छन् । एक विज्ञप्ति प्रकाशन गरी क्लबले उनी क्लबबाट बाहिरिने भएको जानकारी दिएको छ। मेस्सीलाई वार्सिलोनाले सम्झौता अनुसार दिनुपर्ने रकम दिन नसक्ने भएपछि नयाँ सम्झौता हुन नसकेको सो विज्ञप्तिमा भनिएको छ ।
मेस्सीले बिहीबार क्लबसँग नयाँ सम्झौता गर्ने भनिए पनि आर्थिक र संरचनागत अवरोधले यो हुन नसकेको क्लबले विज्ञप्तिमार्फत जनाएको छ। ‘मेस्सी अब फुटबल क्लब बार्सिलोनामा रहने छैनन्,’ विज्ञप्तिमा भनिएको छ, ‘खेलाडी र क्लब दुवैको सम्झौता गर्न मनसाय रहे पनि पूरा हुन सकेन।’
बार्सिलोना क्लबले मेस्सीलाई अहिलेसम्म गरेका योगदानका लागि धन्यवाद ज्ञापन गरेको छ । मेस्सी सन् २००३ देखि बार्सिलोना क्लबमा आबद्ध भएका थिए। त्यसको १८ वर्षपछि उनले क्लब छाडेका हुन्।
Add Comment