भोजपुर । श्रीमतीको हत्या गर्ने श्रीमानले आत्महत्या गरेका छन् । श्रीमतीको हत्या गर्ने श्रीमान पनि मृत फेला परेपछि यस्तो खुलासा भएको हो । भोजपुर प्रहरीलाई उद्धृत गर्दै प्रदेश १ प्रहरी कार्यालय विराटनगरले जानकारी गराएको छ ।
शनिबार राती साढे १ बजे खुकुरी प्रहार गरि २८ वर्षीया श्रीमती इन्द्रकला राईको हत्या गर्ने ४० वर्षीय बुद्धिमान राई घर नजिकै मृत फेला परेका हुन् । यो घटना प्रदेश १ को भोजपुर षडानन्द नगरपालिका –९ तालखर्कको हो ।
राती सँगै सुतेकी श्रीमतीको हत्या गरेर घर बाहिर निस्केका श्रीमान बुद्धिमान ४० मिटर टाढा रहेको दुधिलोको रुखमा कपडाको पासोमा मृत फेला परेका थिए ।
आमालाई खुकुरी प्रहार गरेर हत्या गरेको देखेका ८ वर्षीय छोराले घटनाबारे छिमेकीलाई खबर गरेका थिए । छिमेकी घटनास्थल पुग्दा दुबै जना मृत फेला परेका थिए । त्यसपछि छिमेकीहरुले प्रहरीलाई खबर गरेका थिए । घटनाको इलाका प्रहरी कार्यालय साङपाङ र तिवारीभंज्याङबाट खटिएको टोलीले अनुसन्धान गरिरहेको छ ।
Add Comment