काठमाडौं । सत्ता साझेदार नेकपा एमालेका तर्फबाट राष्ट्रपति बनेका सुवास नेम्वाङ्गलाई सरकारको नेतृत्व गरिरहेको नेकपा माओवादी केन्द्रले समथर्न नगरेपछि एमाले सरकारबाट बाहिरिएको छ । पहिलो नम्वरको उपप्रधानमन्त्री सहित ६ मन्त्रालय पाएको एमालेका उपप्रधान तथा अर्थमन्त्री विष्णुप्रसाद पौडेलेको नेतृत्वमा बालुवाटार पुगेको एमाले निकट सवै मन्त्रीहरुले प्रधानमन्त्री पुष्पकमल दाहाल प्रचण्डलाई राजीनामा बुझाएका हुन् ।
मन्त्रिपरिषदमा एमालेबाट उपप्रधानमन्त्री तथा अर्थमन्त्री विष्णु पौडेल, कृषि मन्त्री ज्वालाकुमारी शाह, परराष्ट्रमन्त्री विमला राई पौड्याल, उद्योग, वाणिज्य तथा आपूर्ति मन्त्री दामोदर भण्डारी, स्वास्थ्य तथा जनसंख्यामन्त्री पदम गिरी, रक्षा मन्त्री हरि उप्रेती, महिला बालबालिका तथा ज्येष्ठ नागरिक मन्त्री भगवती चौधरी र भूमिसुधार मन्त्री राजेन्द्रकुमार राई थिए ।
सोमबार दिउँसो बसेको एमालेको सचिवालय बैठकले सरकारबाट बाहिरिने र समर्थन पनि फिर्ता लिने निर्णय गरेको थियो । यसअघि आइतबार साँझ संयुक्त राष्ट्रसंघीय मानव अधिकार परिषदको बैठकमा सहभागी हुन जान लागेकी परराष्ट्र मन्त्री विमला राई पौड्याललाई प्रधानमन्त्रीले रोकेका थिए । एमाले सरकारबाट बाहिरिएपछि फेरि माओवादी र कांग्रेसको समिकरण बन्ने देखिएको छ ।
Add Comment