मनाङ । बाढीका कारण मनाङका धेरै परिवारको बिचल्ली भएको छ । मनाङमा निरन्तरको बर्षासंगै आएको बाढीले धेरै परिवार विस्थापित भइसकेका छन् । मर्स्याङ्दी नदीमा पानीको बहाव बढेर आएकाले तीनसय नागरिकलाई मनाङको कारागारको नवनिर्मित भवनमा सारिएको मनाङका प्रमुख जिल्ला अधिकारी विष्णु लामिछानेले जनाएका छन् । सोमबारदेखि लगातार बर्षा भएकाले अधिकांश घर जोखिममा परेका कारण यसरी तटीय क्षेत्रका बासिन्दालाई स्थानान्तरण गरिएको उनले बताएका छन् ।
मर्स्याङ्दी नदीमा पानीको बहाव बढेपछि गाउँ नै डुवानमा परेको स्थानीयहरू बताउँछन् । गाउँसंगै बिधालय र वडा कार्यालय समेत जोखिममा परेका छन् । उद्धारका लागि प्रहरी र सेना खटिएका छन् । बाढीका कारण बिजुली अवरुद्ध भएको छ । टेलिफोनमा पनि समस्या आएको छ । बाढीले चामे गाउपालिका १, तिमाङ खोलाको बेलिब्रिज बगाएको छ भने तिमाङखोलामै रहेको ३२ किलोवाटको स्याल्क्युखोला लघु जलविद्युत पनि बगाएको स्थानीयले बताएका छन् ।
Add Comment