काठमाडौं । सरकारले निजामती कर्मचारीलाई २ महिना अर्थात ६० दिनभित्र सम्पत्ति विवरण बुझाउन सबै कर्मचारीलाई परिपत्र गरेको छ । राष्ट्रिय किताबखानाले मंगलवार एक सूचना जारी गर्दै २०७७–७८ को सम्पत्ति विवरण बुझाउन परिपत्र गरेको हो । सम्पत्ति विवरण बहालवाला र चालु आर्थिक वर्षामा सेवा निवृत्त दुवैले बुझाउनुपर्ने किताबखानाका महानिर्देशक नेत्र प्रसाद सुवेदीले जानकारी दिए ।
उनका अनुसार सेवा निवृत्त भएका कर्मचारीले समेत आर्थिक वर्ष समाप्त भएको मितिले ६० दिनभित्र आफ्नो सम्पत्ति विवरण सम्बन्धित कार्यालय मार्फत किताबखानामा दर्ता गर्नुपर्नेछ । सम्पत्ति विरण बुझाउने दायित्व सम्बन्धित कर्मचारीमा हुने व्यवस्था भएकोले कानूनले तोकेको समय सीमाभित्र सम्पत्ति विवरण बुझाउन सबै निजामती कर्मचारीलाई आग्रह गरिएको महानिर्देशक सुवेदीले बताए ।
तोकिएको २ महिना अर्थात ६० दिनपछि प्राप्त भएको सम्पत्ति विवरणलाई प्राप्त नभएको सरह मानी अभिलेख नराखिने कितावखानाले जारी गरेको सूचनामा भनिएको छ ।
Add Comment