खानेपानी तथा सरसफाइ आयोजनाको काम तीव्ररूपमा हुँदै

काठमार्डौ । पाँचखाल सहरी खानेपानी तथा सरसफाइ आयोजनाको काम तीव्ररूपमा अघि बढेको छ । निर्धारित समयमै सक्ने गरी आयोजनाका भौतिक पूर्वाधारको काम धमाधम भइरहेको जानकारी छ । पाँचखाल नगरका १० वडाका सात हजारलाई खानेपानी पुराउने लक्ष्यका साथ आयोजना कार्यान्वयन अघि बढाइएको समितिका अध्यक्ष कुमार लामछिानेले बताएका छन् ।

कोरोना सङ्क्रमणको उच्च जोखिमका कारण आयोजनाको कामलाई तीव्र पारिएको छ । नगरमा खानेपानीको व्यवस्थाका लागि भुम्लु गाउँपालिका १० बिमिरेस्थित सुनकोसी नदी किनारमा इनार निर्माणका साथै लिफ्टिङ प्रविधि जडान पानी तान्ने व्यवस्था गरिएको छ ।

हाल मूल र रिजर्भ ट्याङ्कीसम्म पहुँचमार्गको काम भइरहेको समितिका अध्यक्ष कुमार लामछिानेले बताएको हो । उहाँका अनुसार आयोजनाको भौतिक पूर्वाधारको काम ६० प्रतिशत सकेको छ । कोरोना सङ्क्रमणका लहर तथा गत असार साउनमा सुनकोसी नदीको बाढीले मुहान क्षेत्रका संरचनामा क्षति पुराएका कारण आयोजनाको काम केही ढिलाभए पनि निर्धारित समयमै स्थानीयवासीका घर घरमा खानेपानी पुराउने लक्ष्यका रहेको अध्यक्षले बताएका छन् ।

परियोजनाका लागि २०७६ भदौ १२ गते सहरी खानेपानी तथा सरसफाइ क्षेत्रगत आयोजना, नगर विकास कोष, पाँचखाल नगरपालिका र खानेपानी उपभोक्ताबीच सम्झौता गरिएको थियो । आयोजना विसं २०७९ पुस महिनाभित्रै पूरा गर्नुुपर्ने सम्झौतामा उल्लेख छ । आयोजनाको काम नेपाली कम्पनी कन्काइ विल्डर्स् र चिनियाँ कम्पनी हुवाछे ज्वाइन्ट भेन्चरले गरिरहेका हुन् ।

निर्धारित समयसीमाभन्दा पहिल्यै काम सक्ने गरी सरोकारवाला सबै परिचालन भइरहेका बताएको छ । यो आयोजनाका लागि २ अर्ब २१ करोडको लागत लाग्ने अनुमान गरेर निर्माण कम्पनीले १ अर्ब ३४ करोड ६६ लाखमा सक्ने ठेक्का सम्झौता गरेको थियो । सम्झौता शर्तअनुसार कूल लागतकोे ५ प्रतिशत ११ करोड ५ लाख उपभोक्ताले जम्मा गरिसकेका बताऊछन् ।

अध्यक्षका अनुसार आयोजनामा कलेक्टर–वेल चार, सम्प,वेल दुई, भुई ट्याङ्की १६, ब्रेक प्रेसर ट्याङकी छ, पानी प्रशोधन प्लान्ट फ्लोकुलेटर २, प्लेन सेडिमेनटेसन ट्याङ्की २ ¥यापिड–स्याण्ड फिल्टर एक, प्रसारण लाइन ९ दशमलव १३ किलोमिटर, शाखा प्रसारण लाइन ३७ दशमलव २३ किलोमिटर, वितरण लाइन १८९ दशमलव ३ किलोमिटर, कार्यालय भवन एक, गार्ड भवन १७, जेनेरेटर भवन फायरहाइड्रेन्ट २०, इलेक्ट्रिकल तथा इलेक्ट्रोमेकानिकल कार्य तथा अन्य सम्बन्धित कार्यहरू, सरसफाइका संरचनाहरू र २ वटा शौचालय निर्माण भइरहेका छन् ।