काठमाडौँ । बालुवाटार स्थित ‘ललिता निवास क्याम्प’ भित्रको सरकारी जग्गा हिनामिना गरेको आरोपमा पक्राउ गरिएका ४ जनाको बयान पूरा भएको छ । बिहीबार सम्ममा ४ जनाको बयान सकिएको केन्द्रीय अनुसन्धान ब्युरोका एसएसपी दिनेश आचार्यले बताए ।
भाटभटेनी सुपर मार्केटका सञ्चालक मीन बहादुर गुरुङ सहित १७ जनालाई ब्युरोले थुनामा राखेर अनुसन्धान गरिरहेको छ । अनुसन्धानमा संलग्न अधिकृतहरूका अनुसार थुनामा रहेका मध्ये रमेश कुमार पोखरेल, घमान कुमार कार्की, बाबुराजा महर्जन र शिवजी भट्टराईको बयान पुरा भएको छ ।
रमेश कुमार पोखरेल समरजङ्ग कम्पनीका तत्कालीन प्रमुख हुन् । पोखरेल असार १८ मा पक्राउ परेका थिए । घमान कुमारी कार्की नापी सर्वेक्षक हुन् । बालुवाटारको जग्गामा ‘नक्कली मोही’ लाई जम्मा गरेर जग्गा दाबी गर्ने कामको नेतृत्व बाबुराजा महर्जनले गरेका थिए । महर्जनले पनि ‘नक्कली मोही’ बनेर जग्गा आफ्नो नाममा लिएको भेटिएको छ ।
शिवजी भट्टराई तत्कालीन वडा सचिव हुन् । असार १७ मा पक्राउ परेका भट्टराईले गैर कानुनी रूपमा जग्गा व्यक्तिको नाममा लैजानका लागी आवश्यक कागजात सिफारिस सिफारिस दिएका थिए ।
मुख्य आरोपित मीनबहादुर गुरुङ, पूर्व निर्वाचन आयुक्त सुधीर कुमार शाह, पूर्व सचिव रुद्र प्रसाद श्रेष्ठको बयान सकिएको छैन । पूर्व सचिव श्रेष्ठ भूमिसुधार तथा व्यवस्था विभाग महानिर्देशक हुँदा ललिता निवासको जग्गा हिनामिना प्रकरणमा संलग्न देखिएको एसएसपी आचार्यले जानकारी दिए । श्रेष्ठ असार २६ मा पक्राउ परेका हुन् ।
‘ललिता निवास क्याम्प’ भित्रको सरकारी जग्गा हिनामिना प्रकरणमा हालसम्म पक्राउ
१. मीन बहादुर गुरुङ (भाटभटेनी सुपर मार्केटका सञ्चालक, असार १२)
२.सुधीर कुमार शाह ( पूर्व निर्वाचन आयुक्त ।
३. धर्म प्रसाद गौतम, शाखा अधिकृत ।
४.गोपाल कार्की, अवकाश प्राप्त खरिदार
५. शिवजी भट्टराई, तत्कालीन वडा सचिव (असार १७)
६.घमान कुमारी कार्की, नापी सर्वेक्षक ।
७.बाबुराजा महर्जन, नक्कली मोही ।
८.रमेश कुमार पोखरेल, समरजङ्ग कम्पनीका तत्कालीन प्रमुख (असार १८)
९. देव नारायण महर्जन, मोही ।
१०.लोकहरी घिमिरे, समरजङ्ग कम्पनीको तत्कालीन प्रमुख (असार २४)
११.ध्रुब प्रसाद अर्याल, नापी सर्वेक्षक ।
१२. कृष्ण बहादुर राउत, सञ्चार तथा सूचना प्रविधि मन्त्रालयका सचिव ।
१३. योगराज पौडेल, नासु डिल्लीबजार मालपोत । (असार २६)
१४. नारायणदास मिश्र, पूर्व खरिदार डिल्लीबजार मालपोत ।
१५. रुद्र प्रसाद श्रेष्ठ, महानिर्देशक भूमिसुधार तथा व्यवस्था विभाग । (असार २६)
१६. बालकृष्ण श्रेष्ठ, सिडिई भौतिक योजना तथा निर्माण मन्त्रालय ।
१७. बिनोद पौडेल, सह लेखापाल समरजङ्ग कम्पनी । (असार २७)
स्टे अर्डरमा छुटेका
१. कलाधर देउजा, प्रमुख डिल्लीबजार मालपोत ।
२. सुरेन्द्रमान कपाली, अधिकृत ।
३. हुपेन्द्रमणि केसी, शाखा अधिकृत ।
Add Comment