खजुरा । देशका विभिन्न बाल सुधार गृहमा बबाल मच्चाउने १८ वर्ष माथिका बालबन्दीहरुलाई बाँकेको बैजनाथ ३, गाभरस्थित नौवस्तामा निर्माण गरिएको क्षेत्रीय कारागारमा राख्न सुरु गरिएको छ ।
विभिन्न प्रकृतिका अपराध गरेर बाल सुधार गृहमा पुगेर १८ वर्ष नाघेका बाल बन्दीले देशका विभिन्न ठाउँमा बबाल गरेपछि उनीहरूलाई नौवस्तास्थित क्षेत्रीय कारागारमा राख्न सुरु गरिएको हो ।
देशका विभिन्न बाल सुधार गृहबाट १८ वर्ष माथिका ४६ जना बालबन्दीहरुलाई नौवस्ता क्षेत्रीय कारागारमा ल्याएर राखिएको बाँकेका प्रमुख जिल्ला अधिकारी श्रवणकुमार पोख्रेलले जानकारी दिनुभयो । १८ वर्षमाथिका बाल बन्दी रहने बाल सुधार गृह सञ्चालनका लागि महिला, बालबालिका तथा ज्येष्ठ नागरिक मन्त्रालयले नासु स्तरको कर्मचारी खटाएको उनले बताए ।
प्रजिअ पोख्रेलले बैजनाथस्थित नौवस्ता क्षेत्रीय कारागारको चार वटा ब्लकमध्ये एउटा ब्लकमा बाल सुधार गृह सञ्चालन गरिएको जानकारी दिनुभयो । अन्य तीन वटा ब्लक भने सञ्चालन हुन सकेका छैनन् । ती ब्लकहरूमा नेपालगन्जस्थित पुरानो कारागारका कैदीहरूलाई स्थानान्तरण गर्ने तयारी गरिएको उनले जानकारी दिए । कैदी स्थानान्तरणका लागि कारागार विभाग र मन्त्रालयसँग समन्वय भइरहेको प्रजिअ पोख्रेलले जानकारी दिए ।
१८ वर्ष भन्दा मुनीका बालक तथा किशोरलाई बाल सुधार गृहमा राख्ने भनिए पनि १८ वर्ष नपुग्दै अपराध गरेका र तोकिएको सजाय काट्दा बढी उमेर भएका बाल बन्दीलाई पनि एकै ठाउँमा राख्ने गरिएको थियो । उमेर समूह नमिलेका किशोर १८ नाघेका युवाहरूबिच बाँके, ललितपुरलगायत देशका विभिन्न ठाउँमा तनाव हुन थालेपछि सरकारले उनीहरूलाई छुट्टै ठाउँमा राख्न सुरु गरेको बताइएको छ ।
नौ विगाह क्षेत्रफलमा रहेको नौवस्ता क्षेत्रीय कारागार तीन हजार क्षमताको छ । देशभरिकै कारागारमा कैदी बन्दीको सङ्ख्या बढी भएपछि सरकारले नौवस्तामा क्षेत्रीय कारागार बनाएको हो । बनेर तयार भए पनि यहाँ कैदी बन्दी राख्न भने अझै सुरु गरिएको छैन ।
गोरखापत्र
Add Comment