काठमाडौँ । जलवायु परिवर्तनसम्बन्धी संयुक्त राष्ट्रसङ्घीय संरचना महासन्धिअन्तर्गतको अनुकूलन कोषको बोर्ड सदस्यमा वन तथा वातावरण मन्त्रालयका उपसचिव नरेश शर्मा चयन भएका छन् ।
मन्त्रालयको सिफारिसमा उनी अतिकम विकसित राष्ट्रको समूह एलडिसिज ग्रुपका तर्फबाट अनुकूलन कोषको बोर्ड सदस्यमा छनोट भएको मन्त्रालयले जानकारी दिएका छन्। कोषमा अन्य विभिन्न समूहका गरी करिब २० पदाधिकारी रहेका छन् । उपसचिव शर्मा २ वर्ष सन् २०२३ र २०२४०का लागि सो पदमा चयन भएका छन् ।
उक्त पदमा विभिन्न मुलुकबाट विभिन्न व्यक्तिले आवेदन दिएका थिए । कोषको बोर्ड सदस्यमा उनी एलडिसिज ग्रुपका तर्फबाट चयन भएपनि नेपाललाई उक्त कोषको नीति निर्माणमा पहुँच र सहयोग प्राप्तिमा योगदान पुग्ने विश्वास गरेका छन् ।
नेपाल पक्ष राष्ट्र भएको जलवायु परिवर्तनसम्बन्धी महासन्धिको सदस्यका रुपमा काम गर्दै आएको र यस महासन्धिअन्तर्गत विभिन्न निकाय छन् । त्यसमध्ये अनुकूलन कोष महत्वपूर्ण एकाइ रहेको छ । कोषले जलवायु परिवर्तनका असरबाट प्रभावित गरिब र सङ्कटासन्न अवस्थामा रहेका जनतालाई अनुकूलन कार्यमा सहयोग गर्ने बताएका छन् ।
Add Comment