काठमाडौँ । सुर्खेत जिल्लामा पछिल्लो समय लागुऔषधका घटना बढ्दै गएको छ । जिल्ला प्रहरी कार्यालयमा तीन वर्षको अवधिमा लागुऔषधका १ सय ८० मुद्दा दर्ता भएका र त्यसमा सम्लग्न २ सय ९२ प्रतिवादी पक्राउ परेका छन् ।
प्रहरीको तथ्याङ्कअनुसार आर्थिक वर्ष २०७६/७७ मा लागुऔषधका ५२ मुद्दा दर्ता भएका र त्यसको कारोबारमा सम्लग्न ६ महिलासहित ९० जना पक्राउ परेका थिए । आव २०७७/०७८ मा सोही प्रकारका ४९ मुद्दा दर्ता भएकामा कारोबारमा सम्लग्न ८ महिलासहित ६९ जनालाई प्रहरीले पक्राउ गरेको थियो । आव २०७८/०७९ मा ७९ वटा मुद्दा दर्ता भएकामा त्यसमा सम्लग्न ९ महिलासहित १ सय २३ पक्राउ परेका थिए ।
जिल्ला प्रहरी कार्यालयका प्रहरी नायब उपरीक्षक सुरज कार्कीले प्रहरीको सक्रियताका साथै सचेतना अभिवृद्धि गराइएका कारण धेरै मुद्दा दर्ता भएको जानकारी दिएका छन् । “पछिल्लो समय प्रहरीको सक्रियता बढेको छ”, उनले भने, “सबैतिर सचेत गराउँदै आइएको भएर पनि होला लागुऔषधको विषयमा हामीलाई सूचना आउने गर्दछ त्यसकारण सूचनाको आधारमा अनुसन्धान गरी कारबाहीको दायरामा ल्याउन सहज भएको छ ।” प्रहरीको तथ्याङ्कअनुसार आव ०७६/७७ मा ९८ ग्राम ४ सय ३० मिलीग्राम ब्राउन सुगर, ४ किलोग्राम ३ सय २८ चरेस, ३ सय ३२ ग्राम ७ सय ३० मिलीग्राम गाजा बरामद गरिएको थियो । ७७/७८ मा ९२ ग्राम ६ सय ४० मिलीग्राम ब्राउन सुगर बरामद गरिएको थियो
यस्तै ७८/७९ मा १ सय ८७ ग्राम ९ सय ४० मिलीग्राम ब्राउन सुगर, सात ग्राम १ सय ४० मिलीग्राम ह्वाइट सुगर, २ सय ५२ ग्राम ९ सय ३० मिलीग्राम गाजाका साथै नाइट्राभेट, ट्रामोल, कोरेक्सलगायत ट्याब्लेट पनि बरामद गरिएको जानकारी गराएको छ । 
Add Comment