पत्रकारलाई पक्राउ गरेर प्रेस स्वतन्त्रताको आवाज दबाउने प्रयास सफल नहुने सन्देश दिँदै प्रहरीले नियन्त्रणमा लिएका पत्रकार विश्वमणि सुवेदी रिहा भएका छन्।
पत्रकार सुवेदीको पक्राउप्रति पत्रकारिता क्षेत्रबाट विरोध जनाउँदै तत्काल रिहाइको माग गरिएको थियो। सञ्चार गृहमा पुगेर पत्रकारलाई पक्राउ गर्नु प्रेस स्वतन्त्रता, अभिव्यक्ति स्वतन्त्रता र संविधानले सुनिश्चित गरेको नागरिक अधिकारमाथिको हस्तक्षेप भएको भन्दै आलोचना भएको थियो।
शुक्रबार नयाँ बानेश्वरस्थित नेपाल प्रेसको कार्यालयबाट सादा पोसाकमा आएका प्रहरीले सुवेदीलाई नियन्त्रणमा लिएका थिए। उनलाई प्रहरी महानिरीक्षक दानबहादुर कार्कीसँग सम्बन्धित समाचारको स्रोतबारे सोधपुछ गर्न साइबर ब्युरो लगिएको बताइएको थियो।
सुवेदीको पक्राउपछि पत्रकारिता क्षेत्रबाट प्रेस स्वतन्त्रताको रक्षा गर्नुपर्ने आवाज उठेको थियो। पत्रकारलाई समाचार लेखेकै आधारमा पक्राउ गर्ने वा समाचारको स्रोत खुलाउन दबाब दिने कार्यले स्वतन्त्र पत्रकारितामाथि नकारात्मक प्रभाव पार्न सक्ने भन्दै सञ्चारकर्मीहरूले आपत्ति जनाएका थिए।
सुवेदीको रिहाइसँगै पत्रकारलाई नियन्त्रणमा लिएर समाचार लेख्ने र प्रश्न उठाउने आवाज कमजोर पार्न नसकिने सन्देश गएको छ। समाचारप्रति असहमति वा गुनासो भए कानुनी प्रक्रिया र स्थापित संस्थागत संयन्त्रमार्फत समाधान खोजिनुपर्ने पत्रकारिता क्षेत्रको माग छ।
प्रेस स्वतन्त्रता लोकतन्त्रको महत्वपूर्ण आधार भएकाले राज्यका निकायले पत्रकारको संवैधानिक अधिकार र सञ्चारमाध्यमको व्यावसायिक स्वतन्त्रताको सम्मान गर्नुपर्ने आवश्यकता पुनः उजागर भएको छ।
Add Comment