काठमाडौं । गृह मन्त्रालयले सरकारी निर्देशन पालना नगरेको भन्दै राष्ट्रिय निजी तथा आवासीय विद्यालय एसोसिएसन नेपाल (एन–प्याब्सन) लाई निलम्बन गरेको छ।
मन्त्रालयले शुक्रबार सूचना जारी गर्दै राष्ट्रिय निर्देशन ऐन, २०१८ बमोजिम एन–प्याब्सनलाई निलम्बन गरिएको जनाएको हो।
मन्त्रालयका अनुसार एन–प्याब्सनले मन्त्रालयबाट दिइएको निर्देशन पालना गरेको देखिएको छैन। साथै, संगठनका पदाधिकारीहरूले नेपाल सरकारबाट स्वीकृत विधान तथा संस्थाको मूल उद्देश्यविपरीतका गतिविधि गरेको पाइएको सूचनामा उल्लेख छ।
राष्ट्रिय निर्देशन ऐन, २०१८ को दफा ५ बमोजिम दिइएको निर्देशन पालना नगरेको भन्दै मन्त्रालयले ऐनको दफा ६ को उपदफा (२) अनुसार संस्थालाई निलम्बन गर्ने निर्णय गरेको जनाएको छ।
यसैबीच, मन्त्रालयले एन–प्याब्सनको नाममा कुनै पनि समूह वा गुटले गतिविधि सञ्चालन गरेमा त्यस्तो कार्य गैरकानुनी हुने चेतावनी दिएको छ।
मन्त्रालयद्वारा जारी सूचनामा निलम्बनपछि संस्थाको नाममा हुने गतिविधि प्रचलित कानुनअनुसार कारबाहीको विषय बन्ने स्पष्ट पारिएको छ।
गृह मन्त्रालयको यस निर्णयसँगै एन–प्याब्सनको गतिविधि र सरकारी निर्देशनको पालना सम्बन्धमा थप चासो बढेको छ। यद्यपि, निलम्बनको निर्णयले विद्यालय तथा संगठनका आगामी गतिविधिमा कस्तो प्रभाव पार्नेछ भन्ने विषय स्पष्ट हुन बाँकी छ।
Add Comment