‘भगवत’ लाई भागवत बनाउने भागवत र गीताको बीचमा ड्यास थप्ने प्रस्ताव धार्मिक प्रतिनिधिद्वारा अस्वीकार

काठमाडौं । चलचित्र एक भगवत गीताको नामलाई लिएर उत्पन्न विवाद सुल्झाउनका लागि चलचित्र विकास बोर्डमा छलफल जारी छ ।छलफलको प्रारम्भमा चलचित्रका निर्माता सुनिल कुमार थापाले राखेको प्रस्ताव असन्तुष्ट धार्मिक समूहले अस्वीकार गरे ।

थापाले ‘भगवत’ लाई भागवत बनाउने तथा भागवत र गीताको बीचमा ड्यास राख्ने प्रस्ताव राखेका थिए । साथै मयु र बाँसुरीको फोटो हटाउने एवं नाममाथि नेपाली कथानक चलचित्र उल्लेख गर्ने उनको प्रस्ताव थियो ।

थापाको प्रस्तावपछि धार्मिक समूहहरु एकछिन छुट्टै छलफलमा बसे । उनीहरुको छलफलपछि फेरि सामूहिक छलफल भइरहेको छ । यसमा धार्मिक समूहका प्रतिनिधिले थापाको प्रस्ताव अस्वीकार गरेका हुन् ।

छलफलमा बोल्ने धार्मिक प्रतिनिधिले ड्यास राख्नुको औचित्य नहुने बताए ।‘पोस्टरमा ड्यास राखिए पनि भन्दा भगवत गीता नै भनिने हो,’ उनले भने, ‘यसमा हामी सहमत हुन सक्दैनौं ।’

उनले चलचित्र रिलिजअघि मात्र नभएर सुरुदेखि नै आफूहरुले नाममा आपत्ति जनाएको उल्लेख गरे । ‘हामीले सुरुदेखि नै उहाँहरुलाई भनेका हौं । चलचित्र जे विषयमा बनेको हो त्यसैसँग सम्वन्धित नाम राख्दा राम्रो हुन्छ,’ उनले भने ।

कुनै पनि चलिचित्रले कसैको धार्मिक भावनामा चोट पुर्याउनु नहुने उनले बताए ।